Pak Radian dan Ondel-ondel

Nyok, kite nonton ondel-ondel, (nyok)

Nyok, kite ngarak ondel-ondel, (nyok)

Ondel-ondel ada anaknye, (eee)

Anaknye ngigel ter-iteran,….

 

                Ngedenger bocah-bocah kecil itu nyanyi, pak Radian cuma senyum-senyum sambil mandangin ondel-ondelnye yang dipajang di depan rumahnye. Ondel-ondel laki-laki yang wajahnye merah itu mulai pudar dan kelihatan nggak cerah lagi warnanye, sedang ondel-ondel perempuan yang wajahnye putih udah pada mulai terkelupas kulitnye.

                Dua boneka pak Radian itu udah penuh ama debu lantaran jarang diurusin lagi. Udah hampir tiga bulan ondel-ondelnye nggak diajak lagi keliling-keliling buat ngeramaiin suasana acara-acara pesta, seperti acara kawinan, upacara pembukaan, nyambut tamu, atau pawai arak-arakan. Temen-temennye yang ngiringin musik juga udah pada bubar nggak tahu ke mane.

                Pak Radian adalah salah seorang yang suka mentasin ondel-ondel buat ngeramaiin acara di Jakarta. Tapi, seiiring ama perkembangan jaman, kesenian ondel-ondel mulai memudar. Pak Radian yang ngegantungin nasib hidupnye ama ondel-ondelnye, cuma bisa ngeratapin keadaan yang makin nggak sama kaya dulu lagi.

                “Kasihan banget luh ondel-ondel, tiap hari kerjaannye cuma bediriiiii aje di situ. Gue juga kagak bisa ngajak luh jalan-jalan lagi kaya dulu. Nasib kite sama aje.” Kata hati pak Radian yang masih mandangin alat usahanye.

                Pak Radian mulai mengenang masa lalunye sama ondel-ondel yang hampir berumur dua puluh tahun itu. Dulu, sebelum diarak, pak Radian mesti ngasih sarat buat ondel-ondelnye, seperti ngasih minum air kelapa ijo, air putih, atau kopi yang ditaruh di dalam badan si ondel-ondel. Soalnye, pada awalnye ondel-ondel emang dianggap punya kekuatan magis buat penolak bala atau gangguan roh halus yang gentayangan. Tahun 1947 contohnye, wabah cacar di sebuah kampung di Jakarta konon bisa dihilangin abis orang-orang ngarak ondel-ondel keliling kampung.

                Kemudian pak Radian dikagetin ama suara istrinye yang tiba-tiba nongol dari balik pintu.

                “Heh! Bengong aje, tiap hari kerjaannye ngeliatin onde-ondel terus. Emang kagak ade kerjaan yang laen ape selain kerja ame ondel-ondel? Udeh, buang aje tuh ondel-ondel.” Kata istrinye yang bosen ngeliatin suaminye tiap hari bengong di atas bale rumahnye sambil ngeliatin ondel-ondel.

                “Eh, luh tau kagak kalo ondel-ondel ini banyak sejarahnye. Dulu, waktu acara ulang tahun kota Jakarte, gubernur kite udeh pernah nyobain masuk ke dalem ondel-ondel ini sambil ikut maenin.” Jawab pak Radian sambil sedikit ketawa-ketawa.

                “Ah, Abang, ntu kan dulu banget, sekarang juga kagak bakalan orang pengen masuk ke dalem ondel-ondel buluk itu. Boro-boro Gubernur, Jin juga kagak mau masuk ke situ.” Tangkis istrinye sambil pergi ninggalin pak Radian.

                “Hah, mungkin dulu luh juga kagak bisa dandan kalo kagak ade ondel-ondel ini.” Jawab pak Radian lagi nggak mau kalah.

                Belum lama pak Radian ditinggal istrinye, anak perempuannye datang minta dibeliin boneka.

                “Beh, beliin boneka Barby kaya si Turah dong beh.” Pinta anaknye.

                “Aduh, luh kan udah gede, ngapain beli boneka-bonekaan segala, mendingan ntu ondel-ondel aje luh dandanin biar rapi.”

                “Ah, babeh pelit.” Jawab anaknye sambil pergi ninggalin pak Radian sendiri.

                Sekali lagi pak Radian mikirin nasib hidupnye, termasuk keluarganye. Dari jauh pak Radian ngelihat dua orang berpakaian rapi yang lagi jalan menuju rumah pak Radian.

                “Assalamua’laikum.” Kata si tamu.

                “Wa’laikumsalam. Ade perlu ame siape ye?” Jawab pak Radian.

                “Begini pak, saya lagi mencari orang yang bernama Radian, apa betul ini rumah pak Radian?” Tanya tamu itu.

                “Betul pak, emangnye die salah ape pak?” Kata pak Radian balik nanya.

                “Oh, nggak ada apa-apa kok pak, katanya pak Radian suka mentasin ondel-ondel, kami cuma butuh ondel-ondelnya untuk ikut meramaikan suasana ulang tahun Jakarta yang ke-478 tanggal 22 Juni nanti.” Jelas si tamu.

                “Wah, saya sendiri pak yang namanye Radian, nih ondel-ondel saya pak.” Jawab pak Radian sambil nunjuk kedua bonekanye.

                “Baik pak, kalau bapak setuju, tanggal 22 Juni nanti, bapak bisa ikut kami ke senayan beserta ondel-ondel bapak. Mungkin itu saja keperluan kami, dan kami mau langsung permisi.” Kata tamu itu mengakhiri pembicaraan ama pak Radian.

                “Oh, iye pak, aduh nggak minum-minum dulu nih pak? Buru-buru amat.” Kata ak Radian sambil berjabatan tangan ama tamunye itu.

                Tamu itu pun pergi ninggalin rumah pak Radian.

                “He he, akhirnye kita jadi juga keliling-keliling lagi.” Kata pak Radian yang seneng ngedenger tawaran tamunye sambil meluk-melukin ondel-ondelnye.